प्रधानमन्त्री निर्वाचन प्रक्रिया अघि नबढाउन सभामुखलाई एमालेको आग्रह

This News was posted on June 2, 17 3:46 pm

samsad-bhawan-1

१९ जेठ, काठमाडौं – प्रमुख प्रतिपक्ष दल नेकपा एमालेले प्रधानमन्त्री निर्वाचन प्रक्रिया अघि नबढाउन सभामुख ओनसरी घर्तीलाई आग्रह गरेको छ । शुक्रबार संसद भवन नयाँबानेश्वरमा बसेको कार्य व्यवस्था परामर्श समितिको बैठकमा एमालेले संसद अवरुद्ध भईरहेका बेला प्रधानमन्त्री निर्वाचन प्रक्रिया अघि नबढाउन सभामुख घर्तीलाई आग्रह गरेको हो । भरतपुर महानगरपालिकाको मतगणना गरेर संसद अवरोध नखुलेसम्म प्रधानमन्त्री निर्वाचन प्रक्रिया अघि नबढाउन सुझाव दिइएको एमाले नेता राजेन्द्र पाण्डेले जानकारी दिए ।


एमालेले भरतपुर महानगरपालिकाको मतगणना सुरु नभए संसदमा कुनै पनि प्रक्रियामा भाग लिन नसकिने पनि स्पष्ट पारेको छ । यता, सत्तारुढ नेकपा माओवादी केन्द्रले भने प्रधानमन्त्री निर्वाचन प्रक्रिया अघि बढाउने काम सभामुखको भएको टिप्पणी गरेको छ । सभामुखको स्वविवेकीय अधिकार भएकाले प्रधानमन्त्री निर्वाचन प्रक्रिया रोक्न नमिल्ने सुझाव दिइएको नेता रामनारायण बिडारीले जानकारी दिए ।

माओवादी केन्द्रले राष्ट्रपतिले प्रधानमन्त्री निर्वाचन गराउन दिएको आदेश अवज्ञा गर्ने अधिकार सभामुख र प्रमुख प्रतिपक्ष एमाले दुवैलाई नरहेको तर्क समेत गरेको छ । राष्ट्रपति विद्या भण्डारीले बहुमतीय प्रक्रियाबाट प्रधानमन्त्री चयन गर्न विहिबार नै संसदलाई आह्वान गर्नु भएको छ । तर संसद बैठक अवरुद्ध भएकाले सो प्रक्रिया अघि बढाउन सभामुखलाई अप्ठयारो परेको छ ।
बैठकमा अधिकांश दलका नेताहरुले संसद बैठक खोल्ने वातावरण बनाएर प्रधानमन्त्री निर्वाचन प्रक्रिया अघि बढाउन उपयुक्त हुने सुझाव दिएका थिए । संसद सचिवालयले २१ गते प्रधानमन्त्री निर्वाचन गर्ने तयारी गरेको छ । तर एमालेले भरतपुर महानगरपालिकाको मतगणना सुरु नभई संसद बैठक सूचारु गराउन नदिने अडान राख्दै आएको छ । काँग्रेस, माओवादी केन्द्रले भने निर्वाचन सम्बन्धि काम निर्वाचन आयोगको भएको उल्लेख गर्दै त्यस्ता विषयलाई संसदमा प्रवेश गराएर एमालेले मुलुकलाई अनिर्णयको बन्दी बनाएको आरोप लगाउँदै आएको छ ।